Caang Bulan, Nini Anteh jeung Ucingna

Dina caang bulan anu mabra,
Nini anteh nyepeng pageuh ucingna
Ucing cantel candramawat uang-eong bari ngalendotan
Huluna diusapan, tiis hawa di bulan

Waktu panon poe geus lila tilem
Nini anteh, cimatana kaluar nyarakclakan
Mapatahan sangkan ucingna tong nyaba wae
Tong ngan balik sabulan purnama sakali
“Di bulan, bentang teh teu pating kariceup,nini,” tembal ucing.

Basa taneuh nyeuseup halimun-halimun nu endah
Nini anteh, ngalahun ucing nu ngan depa wae
Tuluy diusapan, cimata nini pelesiran kana bulu ucing
“Nini keueung lalajo bumi sorangan, nyeueung alam nu beuki burakrakan”
Ucing cantel candramawat unggeuk-unggeukan
Atra kaayaan bumi tanggal opat welas ti bulan
Bulu punduk ucing ngilu narangtung.

Kaganga (mode: ON)


ᮎᮃᮀ ᮘᮥᮜᮔ᮪, ᮔᮤᮔᮤ ᮃᮔ᮪ᮒᮨᮂ ᮏᮩᮀ ᮅᮎᮤᮀᮔ

ᮓᮤᮔ ᮎᮃᮀ ᮘᮥᮜᮔ᮪ ᮃᮔᮥ ᮙᮘᮢ,
ᮔᮤᮔᮤ ᮃᮔ᮪ᮒᮨᮂ ᮑᮨᮕᮨᮀ ᮕᮌᮩᮂ ᮅᮎᮤᮀᮔ
ᮅᮎᮤᮀ ᮎᮔ᮪ᮒᮨᮜ᮪ ᮎᮔ᮪ᮓᮢᮙᮝᮒ᮪ ᮅᮃᮀ-ᮈᮇᮀ ᮘᮛᮤ ᮍᮜᮨᮔ᮪ᮓᮧᮒᮔ᮪
ᮠᮥᮜᮥᮔ ᮓᮤᮅᮞᮕᮔ᮪, ᮒᮤᮄᮞ᮪ ᮠᮝ ᮓᮤ ᮘᮥᮜᮔ᮪

ᮝᮊ᮪ᮒᮥ ᮕᮔᮧᮔ᮪ ᮕᮧᮈ ᮌᮩᮞ᮪ ᮜᮤᮜ ᮒᮤᮜᮨᮙ᮪
ᮔᮤᮔᮤ ᮃᮔ᮪ᮒᮨᮂ, ᮎᮤᮙᮒᮔ ᮊᮜᮥᮃᮁ ᮑᮛᮊ᮪ᮎᮣᮊᮔ᮪
ᮙᮕᮒᮠᮔ᮪ ᮞᮀᮊᮔ᮪ ᮅᮎᮤᮀᮔ ᮒᮧᮀ ᮑᮘ ᮝᮈ
ᮒᮧᮀ ᮍᮔ᮪ ᮘᮜᮤᮊ᮪ ᮞᮘᮥᮜᮔ᮪ ᮕᮥᮁᮔᮙ ᮞᮊᮜᮤ
“ᮓᮤ ᮘᮥᮜᮔ᮪, ᮘᮨᮔ᮪ᮒᮀ ᮒᮨᮂ ᮒᮩ ᮕᮒᮤᮀ ᮊᮛᮤᮎᮩᮕ᮪,ᮔᮤᮔᮤ,” ᮒᮨᮙ᮪ᮘᮜ᮪ ᮅᮎᮤᮀ.

ᮘᮞ ᮒᮔᮩᮂ ᮑᮩᮞᮩᮕ᮪ ᮠᮜᮤᮙᮥᮔ᮪-ᮠᮜᮤᮙᮥᮔ᮪ ᮔᮥ ᮈᮔ᮪ᮓᮂ
ᮔᮤᮔᮤ ᮃᮔ᮪ᮒᮨᮂ, ᮍᮜᮠᮥᮔ᮪ ᮅᮎᮤᮀ ᮔᮥ ᮍᮔ᮪ ᮓᮨᮕ ᮝᮈ
ᮒᮥᮜᮥᮚ᮪ ᮓᮤᮅᮞᮕᮔ᮪, ᮎᮤᮙᮒ ᮔᮤᮔᮤ ᮕᮨᮜᮨᮞᮤᮛᮔ᮪ ᮊᮔ ᮘᮥᮜᮥ ᮅᮎᮤᮀ
“ᮔᮤᮔᮤ ᮊᮩᮉᮀ ᮜᮜᮏᮧ ᮘᮥᮙᮤ ᮞᮧᮛᮍᮔ᮪, ᮑᮩᮉᮀ ᮃᮜᮙ᮪ ᮔᮥ ᮘᮩᮊᮤ ᮘᮥᮛᮊᮢᮊᮔ᮪”
ᮅᮎᮤᮀ ᮎᮔ᮪ᮒᮨᮜ᮪ ᮎᮔ᮪ᮓᮢᮙᮝᮒ᮪ ᮅᮀᮌᮩᮊ᮪-ᮅᮀᮌᮩᮊᮔ᮪
ᮃᮒᮢ ᮊᮃᮚᮃᮔ᮪ ᮘᮥᮙᮤ ᮒᮀᮌᮜ᮪ ᮇᮕᮒ᮪ ᮝᮨᮜᮞ᮪ ᮒᮤ ᮘᮥᮜᮔ᮪
ᮘᮥᮜᮥ ᮕᮥᮔ᮪ᮓᮥᮊ᮪ ᮅᮎᮤᮀ ᮍᮤᮜᮥ ᮔᮛᮀᮒᮥᮀ.

Ema

EMA



Dina simpena angin janari

Nyaring kageuing ku tiris angin peuting

Ngulisik ku sora hariring wening

Nguniang kagembang ku sora tembang


Ema ……

Geuning ema nuju sujud sumegruk na amparan sajadah

Ana cengkat panangan ema ranggah

Atra cisoca ema nyarengan rasa nungagalura


Ema….

Kinanti ema geuning kinanti Illahi

Ciri asih ka nyai

Asmarandana ema asmarandana doa

Tanda cinta ka aa.

Ema geuning leres sorga nyai aya dina dampal sampean ema.

Ema dina keclak cisoca ema aya karumasa nyai

Hapunten abdi ema.



(Nurul Aisyah untuk Ibu Ety Nurhayati)
08-maret-2008



Kaganga:

ᮈᮙ



ᮓᮤᮔ ᮞᮤᮙ᮪ᮕᮨᮔ ᮃᮍᮤᮔ᮪ ᮏᮔᮛᮤ

ᮑᮛᮤᮀ ᮊᮌᮩᮄᮀ ᮊᮥ ᮒᮤᮛᮤᮞ᮪ ᮃᮍᮤᮔ᮪ ᮕᮩᮒᮤᮀ

ᮍᮥᮜᮤᮞᮤᮊ᮪ ᮊᮥ ᮞᮧᮛ ᮠᮛᮤᮛᮤᮀ ᮝᮨᮔᮤᮀ

ᮍᮥᮔᮤᮃᮀ ᮊᮌᮨᮙ᮪ᮘᮀ ᮊᮥ ᮞᮧᮛ ᮒᮨᮙ᮪ᮘᮀ


ᮈᮙ ……

ᮌᮩᮔᮤᮀ ᮈᮙ ᮔᮥᮏᮥ ᮞᮥᮏᮥᮓ᮪ ᮞᮥᮙᮨᮌᮢᮥᮊ᮪ ᮔ ᮃᮙ᮪ᮕᮛᮔ᮪ ᮞᮏᮓᮂ

ᮃᮔ ᮎᮨᮀᮊᮒ᮪ ᮕᮔᮍᮔ᮪ ᮈᮙ ᮛᮀᮌᮂ

ᮃᮒᮢ ᮎᮤᮞᮧᮎ ᮈᮙ ᮑᮛᮨᮍᮔ᮪ ᮛᮞ ᮔᮥᮍᮌᮜᮥᮛ


ᮈᮙ….

ᮊᮤᮔᮔ᮪ᮒᮤ ᮈᮙ ᮌᮩᮔᮤᮀ ᮊᮤᮔᮔ᮪ᮒᮤ ᮄᮜᮣᮠᮤ

ᮎᮤᮛᮤ ᮃᮞᮤᮂ ᮊ ᮑᮄ

ᮃᮞ᮪ᮙᮛᮔ᮪ᮓᮔ ᮈᮙ ᮃᮞ᮪ᮙᮛᮔ᮪ᮓᮔ ᮓᮧᮃ

ᮒᮔ᮪ᮓ ᮎᮤᮔ᮪ᮒ ᮊ ᮃᮃ.

ᮈᮙ ᮌᮩᮔᮤᮀ ᮜᮨᮛᮨᮞ᮪ ᮞᮧᮁᮌ ᮑᮄ ᮃᮚ ᮓᮤᮔ ᮓᮙ᮪ᮕᮜ᮪ ᮞᮙ᮪ᮕᮨᮃᮔ᮪ ᮈᮙ.

ᮈᮙ ᮓᮤᮔ ᮊᮨᮎᮣᮊ᮪ ᮎᮤᮞᮧᮎ ᮈᮙ ᮃᮚ ᮊᮛᮥᮙᮞ ᮑᮄ

ᮠᮕᮥᮔ᮪ᮒᮨᮔ᮪ ᮃᮘ᮪ᮓᮤ ᮈᮙ.


(ᮔᮥᮛᮥᮜ᮪ ᮃᮄᮯᮂ ᮅᮔ᮪ᮒᮥᮊ᮪ ᮄᮘᮥ ᮈᮒ᮪ᮚ᮪ ᮔᮥᮁᮠᮚᮒᮤ)
|᮰᮸|-ᮙᮛᮨᮒ᮪-|᮲᮰᮰᮸|